कोकणातली एक दुर्मिळ आणि अविस्मरणीय भेट!
BLUE-EARED KINGFISHERकोकण हे नेहमीच माझ्यासाठी खास राहिले आहे. माझ्या भावाचे कोकणातील घर म्हणजे निसर्गाच्या सान्निध्यात वसलेले एक सुंदर ठिकाण.
या घरासाठी काही ऑटोमेशनची कामे करण्यासाठी आतापर्यंत तीन वेळा कोकणात जाणे झाले. घरात नसतानाही काही गोष्टी दूरवरून नियंत्रित करता याव्यात, हा त्यामागचा उद्देश होता. पण यावेळच्या तिसऱ्या भेटीत निसर्गाने एक अनपेक्षित भेट दिली!
यावेळी नशिबाने साथ दिली आणि वाहत्या पाण्याच्या प्रवाहाजवळ Blue-eared Kingfisher (ब्ल्यू-इअर्ड किंगफिशर) या अतिशय सुंदर पक्ष्याचे दर्शन घडले. त्याला कॅमेऱ्यात टिपण्याची संधी मिळाली, हा आनंद काही वेगळाच होता.
हा पक्षी अतिशय दुर्मिळ, लाजाळू आणि सहसा नजरेस न पडणारा आहे. स्वच्छ, शांत आणि दाट सावली असलेल्या पाणवठ्यांच्या परिसरातच त्याचे वास्तव्य असते. त्यामुळे या ठिकाणी त्याचे दर्शन होणे ही केवळ पक्षीप्रेमींसाठी आनंदाची गोष्ट नाही, तर या परिसरातील निसर्ग अजूनही किती सुंदर, स्वच्छ आणि अबाधित आहे याची जणू पावतीच आहे!
या परिसरात या पक्ष्याला त्याच्या विणीच्या हंगामात पाहण्यासाठी ठिकाणे आहेत. विशेष म्हणजे, या पक्ष्याची उपलब्ध असलेली जवळपास ९० टक्के छायाचित्रे विणीच्या हंगामातील आहेत.
अशा परिस्थितीत नोव्हेंबर महिन्यात, संध्याकाळच्या उशिराच्या वेळी, वाहत्या पाण्याच्या प्रवाहाजवळ या सुंदर पक्ष्याचे दर्शन होणे हा खरोखरच दुर्मिळ आणि आनंदाचा क्षण होता.
घराच्या ऑटोमेशनच्या कामासाठी केलेल्या या तिसऱ्या भेटीत अशी अनपेक्षित भेट मिळेल, याची अजिबात कल्पना नव्हती.
कधी कधी पक्ष्यांच्या शोधात जाण्याची गरज नसते... आपण योग्य ठिकाणी आणि योग्य वेळी असलो की निसर्ग स्वतःहून असे काही सुंदर क्षण आपल्या पदरात टाकतो!
कोकणातील हा अविस्मरणीय क्षण... निसर्गाने दिलेली एक अनमोल भेट!